政情：食署甩漏 愈揭愈臭 翻新公廁冇水沖

六億元改善工程被指龜速

審計署曾發表報告踢爆食環署管理的約八百間公廁中，有四分之一已超過十年冇翻新、十一至十八年冇翻新嘅更佔五分之一，同時冇喺過去十年納入翻新計劃，包括廿九間使用率高嘅公廁。

有議員尋日喺立法會提出書面質詢，話喺疫情下，政府呼籲市民要勤洗手，同埋如廁後蓋上廁板先沖廁，以免散播病原體，但佢就收到投訴，話荃灣一個公廁完成咗優化工程後竟然冇沖廁水供應，直至佢轉介投訴後先得到解決。呢個公廁嘅問題可能只係冰山一角，所以嗰位議員就追問政府計劃喺一九至二○年度起嘅五年內用六億元推行優化公廁翻新計劃，政府監管能力成疑。

連續3年投訴數字破二千

食物及衞生局局長書面回覆都係耍官腔，例牌交代巡查嘅次數，例如旅遊景點嘅公廁，食環署每日最少巡查一次，人流稀少嘅公廁就會每日同隔日進行巡查，偏遠位置同人流唔多嘅公廁，就會按實際情況決定合適嘅巡查次數。咁講，即係話食環署冇偷懶o架！

既然講到食環署做到足，咁應該冇投訴喇！咁又錯晒喎，事關投訴數字連續三年都有二千宗以上，由一七年至一九年，食環署接獲嘅投訴，分別係二千九百一十三宗、二千六百二十六宗同二千三百六十七宗，主要涉及公廁服務、管理同氣味。睇番啲數字，大多係投訴服務同管理，三年以嚟都高達二千幾宗，而涉及氣味嘅投訴雖然佔少數，但就有上升趨勢。

雖則公廁嘅整體投訴數字有下降嘅趨勢，但跌幅好少，都唔夠一成，有啲地區仲出現反彈，例如油尖旺，喺一七年收到三百零六宗投訴，一八年跌至一百八十八宗，但到咗一九年又增至一百九十二宗，又例如中西區，喺一七年收到三百零一宗，一八年就降至二百二十宗，到一九年就增至二百三十宗。好似算有少少改善？咁就再睇吓北區啦，由一七年嘅一百六十六宗，一八年增至二百一十四宗，一九年更係多至二百五十五宗，即係幾年嚟收到嘅投訴不斷上升。呢啲數字反映咗乜嘢？就係食環署做得唔好囉，若果公廁嘅服務同管理做得好，又點會仲有咁多投訴同反彈吖！

其實，公廁環境惡劣、衞生同服務差，已經令市民嘅怨氣爆燈，政府話用幾億元去做優化翻新工程，但優化咗嘅公廁竟然冇水沖廁，衞生好得去邊吖，即係叫市民唔好用啫！