中環出更：裁判官讚擲燃彈少年 葛珮帆去信投訴
一名十五歲男生為發洩對政府、建制派及警隊嘅不滿，向馬路投擲汽油彈，佢早前承認縱火同管有物品意圖損壞財產兩罪，而裁判官水佳麗喺前日稱被告係「優秀嘅細路」，認同佢滿腔熱誠深愛香港，故接納感化官建議，判十八個月感化。議員葛珮帆對事件感到驚訝，指大量市民投訴判詞及判決偏頗，故去信要求首席法官馬道立嚴肅處理涉及呢宗案件嘅投訴。
誤以為「愛香港」可用暴力
葛珮帆批評，今次判決恐怕會向公眾釋出極之不良嘅訊息，令年輕人誤以為「愛香港」就可以用暴力行為嚟表達意見。佢亦收到好多家長嘅投訴，認為今次裁決對下一代有深遠嘅壞影響，係「教壞細路」。佢又指，區域法院法官郭偉健早前因形容被告「高尚情操」而被撤換，故司法機構理應以同一標準處理法官涉違反《法官行為指引》事宜，故要求以同一尺度嚴肅處理涉及水佳麗嘅投訴，以釋除公眾嘅疑慮。此外，佢亦去信司法及法律事務委員會主席梁美芬，要求將該事宜納入議程進行討論。
卓妮