中環出更：通宵留守立會備戰 議員齊歎早餐
立法會尋日恢復《國歌法》二讀辯論，鑑於早前有網民發起包圍立法會行動，警方喺金鐘同灣仔一帶嚴密布防外，亦有部分議員擔心交通方面會有阻滯，前晚就開始喺立法會大樓通宵留守。尋日朝早八點幾，立法會餐廳就己經座無虛席。雖然禁聚令已屆尾聲，但一眾議員都遵守群組聚集唔超過八人嘅限制，各自分成幾組坐喺唔同嘅餐枱享用早餐。
餐廳內最大嘅群組，係立法會主席梁君彥、同屬經民聯嘅地產及建造界議員石禮謙、工程界議員盧偉國、金融服務界議員張華峰（肥老闆），同枱一齊歎早餐嘅仲有財務委員會主席陳健波（波哥）、民建聯進出口界議員黃定光、金融界議員陳振英、旅遊界議員姚思榮。其中肥老闆點咗沙嗲牛肉米粉、腸仔煎太陽蛋同埋熱奶茶，問佢尋晚匿喺立法會有咩活動做，肥老闆就話睇電視消磨時間，又話喺立法會過夜唔係咁舒服，所以好早就醒咗。至於尋日朝早須主持工務小組委員會會議嘅盧偉國，到底有冇喺立法會「打地鋪」呢？佢就秘而不宣，只係形容依家「打緊仗」，唔方便透露「軍情」喎。
寫字枱放床墊 波哥瞓得5粒鐘
至於波哥就話前晚執辦公室，由於自己間房無梳化，必須清理寫字枱上面嘅電腦同電線，先可以鋪床墊就寢。但由於腰骨痛加上冷氣凍，輾轉反側都算瞓到五個鐘，之後起床上健身室沖個涼就落嚟食早餐。
同場食早餐嘅建制派議員，仲有兩位民建聯議員鄭泳舜同周浩鼎，另一餐枱嘅座上客亦包括建築、測量、都市規劃及園境界議員謝偉銓，及自由黨飲食界議員張宇人、零售及批發界議員邵家輝同航運交通界議員易志明。
民主派議員方面就有人民力量議員陳志全、民主黨議員尹兆堅同資訊科技界議員莫乃光。
卓妮