政情：公民講場：油價高企 政府離地唔睇大數 搞程式計嗰一個幾毫

油公司向來都有推出入油回贈或折扣卡等形形式式嘅優惠，但條款繁複。消費者委會總幹事黃鳳嫺話，打算喺年底推出改良版嘅油價計算機應用程式，希望可以幫駕駛者精明格價，比較油價以及唔同油公司推出嘅優惠。不過就算有得格價，唔同油公司推出嘅優惠可能只係相差一個幾毫，對減輕車主嘅燃油開支，幫助唔會好大。況且係職業司機嘅話，各大油公司嘅價錢早已計慣計熟，又點會需要消委會個程式嚟教呢？與其靠消委會搞油價計算機程式計埋啲婆乸數，不如政府諗辦法敦促油公司減價仲實際啦！