政情：泛民玩抵制 小組委員清一色建制
立法會內務委員會（內會）選主席風波沒完沒了，以為選到主席就會平息，點知班非建制派唔承認個會同內會主席李慧琼，更唔承認內會成立嘅小組或法案委員會。其中資深司法任命建議小組委員會日前公布咗委員名單，截至前日，加入小組委員會嘅十位議員清一色都係建制派，唔通班非建制派想抵制晒喺內會成立嘅小組同委員會？
今次呢個小組委員會係審議司法任命建議，理論上冇乜爭議，部分泛民議員都係大律師同埋律師，但竟然唔加入。有泛民議員就話唔承認李慧琼嘅主席身份，同埋怕畀人覺得會承認咗佢主持下嘅非法會議，所以就索性唔加入喺呢一兩星期由內會成立嘅小組同法案委員會喇。
糧又照出 議員斥不負責任
小組委員會嘅委員、地產及建造界議員石禮謙就話冇辦法喇，認為既然泛民唔肯接受內會主席選舉結果，又點會接受內會生出嚟嘅「子子孫孫」呢。另一位委員葛珮帆就批評泛民議員不負責任，認為李慧琼係合法合理嘅內會主席，形容泛民「死唔認數」同撒賴，批評泛民明顯唔想開會同做嘢，連啲一直關心嘅議案都唔理，但糧又照出喎！