中環出更：青梅大豐收 梁福元自家製佳釀
喜歡田園生活嘅十八鄉鄉事委員會前主席梁福元，一踏入初夏就得享務農嘅收穫。話說今年雨水較少，天氣溫暖，多種水果如荔枝、提子及青梅等，都非常當造且大豐收，而梁喺大棠有機生態園內嘅梅花園，早前就結出好多青梅。青梅經採摘後，除咗曬乾以製成話梅，亦會用嚟浸梅酒。
儘管浸酒嘅步驟唔算複雜，但梅酒要芬芳馥郁，就需要相當嘅時日。梁福元話新浸嘅梅酒都置於陰涼處，儲存一年半載後就告成酒，當然時間再長啲，梅香將會更加撲鼻。梁又期望酒成之時，疫情早已絕迹，屆時毋須再戴口罩，大家一齊開懷暢飲。至於今次浸梅酒所用嘅基底酒，就有孖蒸、高粱、桂花陳以及日本清酒，以求浸出風味各異嘅梅酒。
雖然可用嘅基底酒並冇劃一，但同樣屬於米酒類嘅中國孖蒸，同日本清酒所浸出嚟嘅梅酒，到底兩者有咩分別呢？SSI國際唎酒師黎少平指，孖蒸係經過蒸餾嘅米酒，因酒精度較高，浸梅酒嘅風味會較為強烈；至於清酒則屬於釀造酒，酒精度較低，浸出嚟嘅梅酒就會較為溫柔。由於未經蒸餾，清酒裏面嘅酵母菌會繼續起作用，因此適飲期約莫只得一至兩年，但若以清酒嚟浸梅酒的話，青梅所含嘅酸性就會對酵母菌有所抑制，適飲期可延長到三至四年。
張耀成推介皮蛋佐紅酒
香港電腦商會創會會長張耀成亦喜好杯中物，且對飲紅酒有相當心得。張話要令紅酒嘅質素得到提升，不妨以皮蛋為佐酒食品。原因係皮蛋屬鹼性，可以中和紅酒當中嘅果酸，口感特別順滑。不過張認為要有最佳效果，宜選用溏心皮蛋，而紅酒亦毋須購買昂貴貨色，因為皮蛋配搭質素平庸嘅紅酒，效果會特別明顯。
卓妮