政情：謝偉銓斥攬炒派阻工程 憂多系畢業生變量地官
最新嘅失業率高達百之五點二，政府預計下月嘅數字會再創新高。打工仔冇咗飯碗，班畢業生搵工就更加凍過水喇！建築、測量、都市規劃及園境界議員謝偉銓（Tony）直指只要「攬炒」派議員唔「拉布」，喺合理時間內審議建造工程嘅撥款，每年有逾千億元嘅工程，咁就唔使擔心畢業變成失業。但以依家嘅亂局嚟睇，就一啲都唔樂觀喎。
要求政府加開實習職位
Tony話業界公司今年會減少，甚至唔請應屆嘅建測規園畢業生，咁樣唔止影響畢業生就業機會，仲會影響佢哋考取專業資格嘅時間，長遠令業界出現斷層，不利整個專業發展。佢話好明白啲畢業生擔心會變無牌「量地官」，所以佢聯同建測規園四個學會代表日前向發展局反映，要求政府加開實習職位，同埋資助私營公司聘請更多畢業生同培訓更多建測規園專業人才。
發展局早前都話會增加更多業界嘅培訓同實習職位，Tony話當局亦會參考工程界由政府資助嘅培訓計劃，推動建測規園四個學會與私人機構合作，培訓畢業生，創造更多實習職位喎。