中環出更：留戀住家飯 鄭美恩盼賦予大米內涵
人在外，最掛住嘅係乜嘢？當然係屋企人喇，而金紫荊女企業家協會常務副主席鄭美恩（Lisa）就有深刻嘅體會，仲話好珍惜同留戀住家飯添！
Lisa喺美國波士頓大學畢業後，就入私人銀行做嘢，一做就差不多廿年，分別喺香港、美國同瑞士生活。佢話離鄉別井嘅時候，尤其珍惜同留戀喺屋企同家人一齊食飯嘅日子，因為咁樣亦係一個重要家庭教育嘅開始。點解？佢話細個時經常聽到長輩教落，農夫種植大米，粒粒皆辛苦，唔好浪費。
唔知係咪咁，所以Lisa就將米變成事實。佢話創業初期經常去外地考察大米，加上不斷鑽研同學習，終於喺舊年年底創造自家品牌添！佢仲話茶有茶嘅文化，酒有酒嘅文化，而喺佢心中就一直有一個夢想，希望創造同賦予大米更多嘅文化內涵，例如將米變成感情嘅禮物。
鄭麗莎方國珊原來係「糕手」
講到食，另一個Lisa、即係「蜘蛛女」鄭麗莎日前就喺社交平台捧咗一盤出爐麵包出嚟，啲麵包嘅造型好可愛o架，有魚、狗狗、兔同熊仔等等，好明顯係氹小朋友，睇嚟佢四個仔女會搶住食呀！有網友就留言大讚「美媽廚房，吃了先講」，亦有唔少網友大讚啲動物造型麵包好可愛，但有網友問點解狗狗變咗形？另有網民亦問「底嗰兩條係蚺蛇？」講緊應該係魚嚟喎。
政界人士亦有「糕手」，例如西貢區議員方國珊（哪吒）。佢之前喺網上教過裹蒸糉，日前就轉咗整西式糕點，自家手製藍莓蛋糕杯，讚自己有水準，話街坊有口福添！見到製成品，有網友讚「好靚喎，有冇製方分享呀？不塌下來喎」。另一網友就求食譜，仲問有冇免焗版添！
卓妮