政情：黃定光爆粗 鬧黑暴摧毀港繁榮
話說立法會財委會尋日繼續審議海洋公園申請嘅五十四億元撥款吊命，議員黃定光（象哥）就喺會上異常激動，話雖然佢所屬嘅政黨仲對撥款未有定案，但佢本人就非常支持喎。因為無論公園過去點努力，冇客乜都假，之前嘅佔中運動、購物團，同埋最近嘅黑暴，搞到社會唔能夠穩定，又何來繁榮呢？佢愈講愈激動，甚至爆粗，話各樣因素令各行各業都「×街」！
在席議員即刻嘩嘩聲
會議上各人聽到象哥爆粗都即刻嘩嘩聲，主席陳健波都開聲叫象哥注意言詞，但象哥好似仲係好氣憤，話用「凋零」取代「×街」，話「凋零得啦啩？」佢又話，擔心倒閉後清盤會引起連鎖反應同骨牌效應，到時起碼億億聲，喺經濟效益考慮下都會支持撥款。
點解象哥會咁激動呢？會唔會係因為當年佢帶頭搞嘅新田購物城，就係因為冇客而要舊年八月執笠，可能佢諗番起就嬲。