中環出更：林鄭錯引曼德拉名言 特首辦致歉
香港中學文憑試歷史科試卷涉日本侵華嘅「賣國試題」引起社會爭議，而特首林鄭月娥尋日話對事件表示遺憾同失望，期間仲引用南非已故前總統曼德拉嘅名言，話「教育的崩潰足以摧毀一個國家」。但點知所謂嘅「名言」根本唔係出自曼德拉之口囉！特首辦其後就「認衰」，並向大家致歉。
辯稱有不同版本及出處
林鄭引用完曼德拉嘅「名言」之後，唔少專家、學者對此表示質疑，事件亦引起網民討論。而特首辦就急急腳去「Fact Check（查核事實）」，直至夜晚先解釋，話「該引述是有不同版本和出處，政府樂意接受指正，並對若因此引起的誤會表示歉意。」
特首辦仲話曼德拉有教無類嘅教育理念舉世公認，而教育對任何國家同地方嘅重要性都係毋庸置疑，政府同樣十分重視教育，教育當局將繼續肩負確保教育質素嘅責任。特首辦主任陳國基就補充話，特首發言嘅意思同內涵一樣，就係教育要做好把關工作。其實無論意思同內涵係咪一樣，總之發言嘅內容出錯就係事實。
卓妮