中環出更：與疫作賽 李慧詩感激隊友鼓勵
因為疫情關係，市民都選擇多啲留喺屋企，同朋友少咗見面，加上之前口罩短缺，成日都要周圍撲口罩，搞到大家都心情麻麻，喺呢個時候就更加需要一啲正能量喇！早前就有三位傑青同大家分享佢哋嘅小故事，為大家打打氣！
李慧詩（Sarah）係好出名嘅單車運動員，因為疫情關係佢需要留喺體育學院入面。Sarah形容最近嘅心情有啲緊張，就好似要準備比賽咁，因為疫情期間更加要保持自己唔可以病。Sarah又自爆其實佢都唔係每日都咁開心o架，所以佢認為朋友同隊友嘅鼓勵好重要。提到奧運要延遲一年，有人會話佢已經太老，Sarah反而指出外國有好多運動員年紀都大過佢，認為唔使擔心。
另一位傑青係香港第一位印度裔駐冊社工Jeffrey，Jeffrey係土生土長嘅香港人，祖父輩喺一九七○年代已經嚟到香港。Jeffrey話由細到大都係同其他外籍小朋友讀書，直到二十八歲嗰年決定讀社工攞牌，先第一次同成班香港人同學仔一齊上堂，佢都同同學相處得好好，例如同學會問佢一啲英文嘅問題，Jeffrey有中文語法唔識都會問同學。Jeffrey又話細個係因為鍾意踢波，喺街場踢，慢慢講得多咗，就學識中文，佢仲講笑話去到外國唐人街買嘢，同店主講中文都嚇親人添！
葉維昌面對創傷 努力向前走
第三位出場嘅傑青係紅十字國際委員會前區域主管葉維昌，佢曾經擔任國際人道救援人員。佢話喺大學二年級嗰陣到訪肯尼亞貧民區，令佢立志幫人。佢又憶述喺戰亂地區工作時，每晚都會同媽媽視訊通話，有一次通話期間，有一個炸彈飛到佢後面，令佢同媽媽都好難忘。睇到咁多傷心嘅畫面，要點樣面對創傷，佢就話要努力向前走啦！
卓妮