政情：公民講場：運動員欠款唔還 楊德強歎慢板

為推動體育發展，藝術及體育發展基金嘅體育部分，近十年來批出嘅資助數以億元計。然而上個月嘅審計報告，揭示有受資助運動員未有按規定，將未用嘅資助結餘退還畀政府，涉款高達六十萬元，其中有個案更拖延超過兩年，先至退還未用結餘。有議員就質疑當局有冇追回款項，及就此作出處分。民政事務局體育專員楊德強就話當局係有不斷追討㗎，仲係屢追屢勸添！但礙於現行機制並冇指引如何再作出懲罰，該局只有就遲還款發出警告信。雖然佢話會考慮設立相關機制，處分延遲還款嘅人士，但恐怕處分機制考慮得嚟，有心拖延嘅人都過咗骨喇！