政情：寸高官離地 葉劉認檢討自己
高官離地唔係新事物，但如果畀一個同樣離地嘅人鬧，唔知有乜感受呢？話說議員葉劉淑儀（葉劉）尋日出席一個電視節目時講起離地，身為前高官嘅佢可能都不在其位多年，說話放膽咗，直認自己當年仲喺熱廚房時離地、不諳民情民意，但依家就貼地好多喎。唔止啊，葉劉仲寸班官做慣老闆，出入又有車同司機代勞，想唔離地都幾難喇。
習慣用老闆思維對人
葉劉承認以前做保安局局長時離地，話因為當時係部門架構入面最高位置嘅人，自然習慣用老闆思維去對待所有人。葉劉暗寸特首依家個狀態就好似佢當年，否則都唔會有「喝極你都仲要問」嘅言論出現。另外，佢又話班官基本唔用社交媒體，亦唔係每個地方都可以去，同朋友嘅話題更加唔會係柴米油鹽呢啲閒聊，自然就好容易離地。
被問到覺唔覺得自己離地，葉劉就好肯定咁話「唔離地」，皆因做咗議員十幾年，平時又有用社交媒體觀察民意。如果個個高官都要好似葉劉咁離職後多年先學識貼地，咁就弊喇，絕對唔係市民之福，應該係自求多福先啱。