政情：至少9委員會插旗 石禮謙鋪定路 唔怕泛民拉布
建制派同民主派議員本月八日立法會內務委員會會議上爆發激烈衝突，內會主席李慧琼先後驅逐十一名民主派議員離場後，仲隨即處理十四項法案及三十一項附屬法例。經民聯地產及建造界議員石禮謙就喺會上要求就三條條例草案要求成立法案委員會，又要求就五條附屬法例成立小組委員會跟進，唔單止咁，石幾乎每個法案委員或附屬法例小組委員會都有舉手加入，究竟葫蘆裏賣緊乜嘢藥呢？原來實情認真高招。
最資深議員 可左右法案次序
根據《內務守則》第二十一（C）款規定，當內會喺會議席上將某一項法案交付法案委員會時，議員可於席上以舉手方式表示參加該法案委員會，由該等議員中排名最先者（即最資深議員），負責召開法案委員會首次會議。而石禮謙由二○○○年開始已經係立法會議員，雖然涂謹申同梁耀忠比石更資深，但涂、梁二人並無加入當日內會成立嘅委員會，換言之，石係呢啲委員會嘅最資深議員，意味佢擁有權力決定首次會議日期同時間，亦能左右法案嘅優先次序，最重要係可以阻止民主派議員透過呢啲委員會「出古惑」拉布，妨礙會議順利進行。
我哋再查閱立法會文件，發現石禮謙近期加入咗最少十三個委員會，當中包括五個小組委員會、六個法案委員會同兩個附屬法例小組委員會，但其中有四個委員會由於委員人數不足，以致未能成立，即石最少加入咗九個委員會。
否認想藉此拉死空置稅草案
至於石禮謙表明反對俗稱「空置稅」嘅《2019年差餉（修訂）條例草案》，外界揣測石想藉成立多個法案委員會及加入多個小組委員會來拉死空置稅呢條草案，但石日前已否認，強調唔使拉布，空置稅已經做唔到，事關今屆立法會會期到七月中就完結，餘下兩個月時間根本處理唔到呢條草案。事實上，空置稅嘅法案委員會要在下月十五日才召開首次會議，搞得嚟真係夠鐘收檔，政府不如等十月下屆立法會會期早啲排隊好過嘞。