中環出更：聶德權勸公僕勿違法 僅發信難阻嚇
暴力反政府示威活動持續超過十一個月，至今有超過八千幾名市民被捕，當中有四十幾人係公務員。上任唔夠一個月嘅公務員事務局局長聶德權日前向公務員發信，提醒公務員絕對唔能夠參與任何非法活動，又強調政府對公務員嘅違法行為「零容忍」。之不過，有學者批評聶只係發信欠阻嚇力，又質疑若果發信係有用嘅話，公務員「反中亂港」問題就唔會拖到依家都解決唔到！
學者倡即時停職或辭退
過去本港公務員一直被質疑欠缺忠誠，特別喺過去反修例風波中，更有公務員策動罷工反對政府。聶德權日前向公務員發信，提醒公務員唔能夠違法，又強調政府唔會姑息違法嘅公務員，強調公務員必須奉公守法、政治中立，唔應該受自身嘅政治信念支配或影響應有職責，又重申公務員必須對行政長官同政府完全忠誠，以及擁護《基本法》。
之不過，理工大學專業及持續教育學院講師陳偉強認為，聶德權今次只係發信提醒，係唔會對本身有「吃裏扒外」心態嘅公務員起任何阻嚇作用。陳又重提舊年多次發生嘅公務員罷工事件，批評當局至今都未有徹查涉事公務員嘅缺席原因，更莫講話對存心罷工嘅人作懲罰；而事後亦無訂立更嚴格嘅新指示，講明未來若有同類事件發生時，當局會點樣懲處涉事公務員，認為政府應即時將佢哋停工或辭退。
卓妮