中環出更：葉詠詩登六人生新境界 藝術家疫轉網上表演
對於好多人嚟講，今年係迎來重大轉變嘅一年，例如著名指揮家葉詠詩，佢嘅工作崗位有所變動。另一方面，唔少藝術家因疫情導致表演場地關閉，結果就諗到轉戰網上表演，連香港藝術發展局都被啟發，預料最快七月會推出大型新計劃，鼓勵藝術家用新方法去做藝術添。
今年「登六」嘅葉詠詩，早前喺慶祝貝多芬二百五十歲誕辰嘅網上訪談中宣布，已於四月尾卸任香港小交響樂團音樂總監，並由五月起轉任樂團嘅桂冠音樂總監，雖然之後都會繼續喺指揮台上見到佢，不過次數就冇以前咁頻密喇。講到貝多芬，葉詠詩就話細個學小提琴，最深刻就係貝多芬嘅《小提琴協奏曲》，因為呢首時長近一小時嘅樂曲，對當時嘅佢嚟講拉到好攰啊。
至於藝發局行政總裁周蕙心（Winsome）出席一個關於國際建築展覽嘅活動時，就講到近幾年香港嘅藝術家一直都周圍走，可惜因呢排疫情咩都停晒。雖則依家本地藝術家唔可以去外國宣傳，但反而激發咗佢哋轉戰網上，用另一種方式繼續表演，呢份靈活多變仲令Winsome好佩服添。譬如有年輕嘅香港鋼琴家聯同十幾名古典音樂演奏家和歌唱家，喺網上進行收費嘅串流直播表演、又有舞團改喺網上教跳舞、亦有劇團將戲劇作品用影像方式去上網畀觀眾欣賞等。
Winsome話喺佢哋身上學到，藝術可以用多啲唔同嘅載體去呈現出嚟，例如利用網上平台，做線上線下合作表演或教學。佢仲透露，藝發局最快七月會推出大型新計劃，鼓勵藝術家用新方法去做藝術咁喎。
袁賽芳難忘漫步北京感覺
同場出席活動嘅創意香港助理總監袁賽芳（Jersey）講到藝術，就諗起香港同北京嘅建築。原來Jersey之前曾經因為工作關係喺北京住咗兩年，到依家都好記得漫步於現代建築物與北京胡同間嘅放鬆感覺，仲話好鍾意去四合院改造嘅餐廳食飯添。
卓妮