中環出更:與水結緣40載 何建宗感觸良多

翻開舊照片,感觸良多。香港嘅紅潮專家、香港極地研究中心創會主席何建宗近日亦拎咗好多舊相出嚟,佢自言喺四十幾年前已經同水結緣嘞!

何建宗近日喺社交平台上載咗幾張年輕時嘅黑白照,其中一張係佢蹲喺水邊嘅相,呢張相已經係四十幾年前,佢仲貼文話「昔日的新娘潭和照鏡潭,流水潺潺,很多學生前往旅遊,我的心已經在想研究水質了。後來『愈走愈遠』……」,真係好遠,佢去咗北極研究極地藻類同水質,喺過去二十幾年來回北極十七次。

另外有幾張舊相,都係佢坐喺船邊,船下邊水面積咗好多垃圾。佢話無乜人會知道當年佢喺度做乜?總之,曾經為香港嘅環保工作貢獻過喇,又話被日曬雨淋海風大浪傷害皮膚嘅日子唔容易o架!不過,有心水清嘅網友就開估,話當年佢係喺度估算每日漂浮嘅海面垃圾呀!佢就回應依家喺政府管理泳灘外加設防護攔網,阻擋垃圾同方便收集,係當年爭取到嘅重要成果之一。

唔單止何建宗,醫院管理局前行政總裁梁栢賢(PY)亦喺社交平台貼文話「舊照片始終都會有懐念的一刻」,佢仲上載咗兩張相「18 Vs 58」 ,對比佢相隔四十年後嘅分別,又話依家已經六十一歲嘞,自覺亦有唔小改變喎。

梁栢賢40年前十足十區瑞強

梁栢賢張十八歲Look 好爆,即刻惹起網上熱論,有網友大讚「梁醫生。你張年輕相真係冇得輸!」另有網友形容佢十足十「民歌王子」區瑞強添!

畀多張相大家睇,估吓呢個BB係邊個?係早前返港要居家隔離嘅「武漢站站長」、香港駐武漢辦主任馮浩賢(Vincent)。依家網上興貼相挑戰,佢貼文話本來冇諗過要接受挑戰,但喺屋企清理塵封嘅舊書時搵到呢張相,忍唔住要發出嚟畀網友睇睇五十多年前嘅佢係乜樣喎。有網民就話佢打錯字,張BB相係三十幾年前,有人亦話佢邊有五張(五十歲)?Vincent就話:「你畀我個樣騙了。」

卓妮

第一手消息請下載on.cc東網iPhone/iPad/Android/Windows Phone Apps