政情：會期將盡 禁電子煙草案擬中止 議員齊轟陳肇始
政府舊年向立法會建議修訂法例，禁止進口、製造或售賣包括電子煙、加熱煙在內嘅另類吸煙產品，但《2019年吸煙（公眾衞生）（修訂）條例草案》至今仍處於法案委員會審議階段。不過，該法案委員會主席郭偉強前晚透過秘書向委員發信，建議中止該法案委員會嘅工作，意味法案將唔能夠喺今屆會期內通過。由於法案具爭議性，唔同議員對郭呢個建議有唔同睇法，有議員反對中止審議法案，亦有議員對此表明支持，但佢哋不約而同都對負責有關法案嘅食物及衞生局局長陳肇始有意見。
今屆立法會會期將會喺今年七月完結，若果有法案未能趕及喺休會前經大會三讀通過，政府要喺下屆立法會選出後重新開展所有立法程序。查實政府早喺舊年二月已經將《2019年吸煙（公眾衞生）（修訂）條例草案》交上立法會審議，但由於法案具爭議性，包括自由黨同人民力量在內唔同陣營都有黨派對其立法方向有保留，即使法案委員會之前已經開過八次會議，但都未能進入條文審議階段，甚至喺今年一月就試過因為法定人數不足而流會添！
郭早前曾希望喺今個月同下個月舉行十次會議以完成審議工作；但佢前晚就話，因為收番嚟嘅答覆同原定目標有差距，加上有委員表明將會提交大量修訂案，認為未必能夠於今屆會期內 完成審議工作，建議中止法案委員會嘅工作，又相信政府將法案直接交上大會處理嘅機會都好微。換句話講，今屆立法會好可能唔會再審議禁止電子煙嘅呢條草案喇！
斥面對簡單問題遊花園
表明反對法案嘅自由黨同人民力量就支持郭今次嘅建議，其中自由黨飲食界議員張宇人（Tommy）就話，其黨友、批發及零售界議員邵家輝已提出多項修正案，而佢本身亦計劃對法案作多項修訂，即使搵到會期開會，可能開十次會都開唔完，仲話相信法案喺今屆都無乜可能通過到喎。Tommy又批評當局將電子煙同加熱煙混為一談，仲鬧爆過去官員出席會議時經常遊花園，即使面對簡單問題時都會選擇唔答或避而不答咁話喎！
質疑未有盡力推動開會
之不過，教育界議員葉建源就反對中止審議，重申立法會有必要通過呢項法案，又形容法案關乎公共衞生同公眾健康，對香港好重要，而且禁售電子煙有助避免學生成為未來煙民。佢又質疑作為主席嘅郭同政府冇足夠決心推動呢條法案，特別係主事嘅陳肇始冇盡力推動郭開會，認為即使法案具爭議性，但都可以透過議會呢個平台討論唔同睇法。