中環出更：科學館歷史博物館擴建陸頌雄倡設林則徐公園

立法會工務小組委員會尋日召開會議，繼續審議擴建科學館及歷史博物館，涉款逾七千幾萬元。期間有議員關心兩間博物館翻新後，係咪可以加強同附近區域嘅聯繫，設計有冇前瞻性等，亦有唔少議員關注近日出現歪曲史實嘅情況，建議擴建後應加強歷史教育，當中勞工界議員陸頌雄就提議加建林則徐紀念公園。

陸頌雄話日前有小學教師錯誤闡述鴉片戰爭嘅起因，認為有老師對殖民主義塗脂抹粉，顛倒是非令人氣憤，竟然將英國人販賣鴉片嘅行為，改成協助中國人戒煙，期望當局喺擴建歷史博物館後，設立「香港歷史館」，加強教育鴉片戰爭嘅史實，又建議當局興建林則徐紀念公園，形容佢係對抗殖民主義嘅民族英雄，應該要被世人記住！

泛民主派嘅議員譚文豪聽完就話，林則徐事件或照片應該擺喺各區警署引以為戒，令警務人員知道販毒係唔啱嘅。由於譚文豪做過飛機師，何君堯就反擊譚，指香港空中發展都有好多醜聞，如要以此為戒，問空中少爺吸毒係咪都可放入歷史博物館呀？

民政事務局副局長陳積志就回應話，所有博物館都有一個行之有效、不偏不倚嘅機制去處理歷史事件，重申佢哋唔會迴避歷史，亦希望全面同正面地反映歷史喎。

卓妮

中環出更：科學館歷史博物館擴建 陸頌雄倡設林則徐公園