中環出更：住得舒服要兼顧天地人 葉頌文：毋須着眼屋企幾大
香港地少人多，寬敞嘅居住空間無疑係人所渴求。環保建築師、傑青葉頌文就認為，由於偏向高空同密集係城市發展嘅大趨勢，建築物嘅設計就要考慮天、地、人，即係除咗居住嘅地方，亦要有接觸自然嘅機會，以及促進鄰居關係，先至係優質生活嘅重要元素。
葉頌文話雖然好多人都着眼於單位面積究竟有幾多呎，又或者有冇無敵大海景，不過就算住得更大更豪華，一踏出自己嘅居住單位，就係只見燈光嘅走火通道，隔籬鄰舍關門閉戶互不相識，咁嘅生活又是否令人嚮往呢？佢指昔日嘅公共屋邨，左鄰右里會打開大門互通聲氣，阿媽會同鄰居打麻雀，而小朋友就喺走廊踢波，嫲嫲就落樓曬棉被，儘管人均居住面積好細，但生活仍教人回味。
要增加城市人同自然接觸嘅機會，建築物宜拓展公共綠化空間，但佢話所謂綠化，並非有個花王日日淋水打理栽種物供大眾觀賞，而係大家都可以參與耕作同種植，以體驗四季更替所帶來嘅生態變化。佢強調良好嘅居住環境必須同外界有所互動，畢竟人係無可能整日都匿喺居所裏面。
李國興：城市規劃應着墨公共空間
葉頌文尋日係以參展人身份，出席香港團隊參加今年威尼斯國際建築雙年展嘅記者會，同場仲有香港大學建築學院高級講師麥詠詩、香港大學建築學系建築保育學部助理教授余家聲。香港建築師學會會長李國興，就話香港居住面積愈來愈細，個人可享用嘅空間更形缺乏，佢建議城市規劃方面，要多花心思去構建公共空間。
而聯合策展人梅鉅川，就指香港同好多參展地區一樣，設於威尼斯嘅展館，其實係三層高民宅嘅地面部分，因此設計之時就要兼顧民宅住客嘅出入同日常起居，雖然難度頗高，但威尼斯將展覽場地融入社區，展館附近嘅商戶都可以蒙受其利，反觀香港嘅展覽場地就同社區有一段距離，因展覽活動而受惠嘅店舖非常有限。
卓妮