政情：民政署葵青區會累鬥累 互扣撥款市民受罪
民政事務總署向區議會「開刀」，早前話要削減十八區區議會撥款，以應付包括疫情在內嘅突發情況，隨即惹起強烈反彈，好多區議員直斥政府以抗疫為名，打壓區議會。由於各區被削減嘅撥款額不一，其中葵青區議會就高達百分之五點六，即係近一百五十萬元，該區議會尋日更通過削減民政署招聘人手撥款嘅動議。你減我撥款，我咪扣番你囉！簡直係累鬥累。
葵青區議會尋日召開大會，多名議員質疑點解各區削減撥款嘅幅度不一，葵青區嘅比例仲要特別高，民政事務專員鄭健解釋，雖然每區劃一削減百分之三嘅撥款，但署方每年都會基於各區人口增減、區內家庭入息中位數等因素調整各區撥款，強調無特別針對邊一區。
動議超支 倡削民政署人手預算
會上又討論到今個財政年度葵青區議會財政預算草案，民主派區議員提出三項臨時動議，包括撥款五十萬元研究區內巴士路線改善及發展、撥款五十萬元研究青衣單車徑通勤道，同埋撥款五十五萬元研究及推廣社區基層醫療，通過咗頭兩項臨時動議後，民政處秘書提醒如果要通過第三項動議，本年度財政預算案嘅赤字就會超過上限嘅百分之二十五。
區議員張鈞翹就提出修訂動議，要求削減由民政署提出聘請區議會職員嘅撥款，由大約四百一十八萬元減約百分之五去到大約三百九十六萬元，並要求民政總署唔可以因為咁而裁減任何員工或對任何員工減薪。
鄭健當然反對削減署方聘請區議會人手嘅撥款啦，佢話區議會預算入面一直都撥出百分之十五嚟請人，如果相關撥款被削減，就可能要削減人手，部分工作小組會難以獲得秘書處嘅服務。但張鈞翹就反駁話，區議會秘書處架構上唔屬於區議會，人手唔夠嘅話應該由民政總署自己撥錢畀民政處請人，指民政處有錢自己請員工，就唔好打劫區議會。
建制派未有投票 無反對下通過
區議會最後喺無人反對下通過上述三個臨時動議，同時通過削減民政署聘請人手撥款，會上嘅建制派議員在席但就無參與投票。
話時話，民政署要閂區議會水喉，區議會就以牙還牙，閂番民政署嘅水喉，擺明係累鬥累，最終邊個受苦？咪又係市民。去到咁對立嘅局面，民政署署長謝小華點拆彈呢？