中環出更：吳克儉終於掂 入紙註冊再婚
人稱「吳得掂」的教育局前局長吳克儉，在任局長時備受批評，但近期終於掂喇！事關本月四日佢喺沙田婚姻登記處入紙註冊再結婚，女方為田景邨浸信會呂郭碧鳳幼稚園校長陳孟宜。吳克儉回應查詢時，親口承認再婚消息。被問到結婚嘅安排細節，如會否擺酒？吳則稱「未諗到呢啲，先做行政程序先」，又指事件沒有被疫情影響。至於兩個仔係咪支持婚事？他則笑言：「私人嘅事，我唔講啦，多謝大家」。
女方為幼園校長
吳克儉前妻梁允愛喺一六年病逝，事後佢曾喺Facebook公布太太死訊，又感謝各界友好關心，更留言「永遠愛您」，事隔至今將近四年，終覓得第二春。據悉，吳喪妻後不久，喺校長會上認識陳孟宜，隨後展開黃昏戀，二人年齡相差十歲。
陳孟宜數年前接受媒體訪問時話，畢業後佢應徵首份工作係櫥窗設計，當時有一千人面試，結果成功被取錄，但因身體不適，故轉職幼兒教學工作至今。佢亦透露，爸爸係一名突發記者，由於採訪工作關係，佢差唔多一個月先見到爸爸一次，但每次回家都同佢哋分享採訪經歷，當中不乏恐怖事件，佢形容係成長過程中嘅特訓，長大後膽量較一般人高。
吳克儉在任教育局局長時備受批評，尤其係面對有家長發起取消小學三年級TSA（全港性系統評估）嘅行動，然而佢當時不但冇正視問題，更被指請假陪老婆去日本睇紅葉，唔出席立法會舉行嘅TSA公聽會。
卓妮