中環出更：曾遇黑客勒索 陳李玉佩拒就範
前排停工停課，打工仔同學生大部分都靠互聯網去工作同學習，但亦衍生出黑客入侵電腦嘅問題，前兩日卓妮去咗九龍樂善堂轉贈愛計劃嘅活動，同主席陳李玉佩傾開呢個問題，佢仲自爆曾經遇過網上勒索。當時點處理？
陳李玉佩話資訊發達有時真係避無可避，自己做工程，周不時都要喺網上做嘢，例如重要決定同傾生意，都會一對一，唔會一大班人開住電腦去傾，盡量減低風險。
彭志宏用獨立電腦儲病人資料
陳李玉佩仲話，年幾前曾經試過網上勒索，仲話要比特幣，恐嚇唔畀就會燒毀晒你公司伺服器記憶。咁佢有冇應承？當然冇啦！佢話將所有重要資料複製之後，果斷地同一時間將全部電腦熄晒機，隔咗成個禮拜先開番，之後就冇事嘞！
兩位副主席彭志宏同蘇裕康都經常用電腦工作。彭本身從醫，每次開啟電腦同檔案時都有用密碼開啟，應該問題就不大，至於病人資料方面，佢話一定要好小心處理，所以用一個電腦獨立儲存病人圖片資料，唔會放上互聯網。
蘇裕康做德國有機嬰兒護膚品，所以成日都要靠電腦同德國嗰邊溝通，幸好冇畀黑客入侵，因公司定期會將電腦內唔要嘅文件大清洗，同埋定期有電腦保安公司更新軟件，不過佢知道有好多同行喺近期收到好大金額嘅訂單，誰不知一開就中毒，佢強調好多時都係黑客趁呢段時間市道低迷用啲大金額去利誘你，所以真係要好小心去處理。
出席活動仲有佛教筏可紀念中學校長惲福龍，佢話近排網上教學都會小心，每次老師都要確認學生身份，要清楚知道學生在線上上課，IT老師會定期更新軟件。
卓妮