喺上年反修例風波期間，唔少人想籌組工會。勞工處最新資料顯示，喺舊年六月至本月二日，職工會登記局收到四千三百廿八宗新職工會登記申請，同期有二百三十間成功登記，成功率百分之五點三。而截至本月二日為止，已登記僱員工會累積到一千零七十六間。
其實，截至一八年底，僱員工會只有八百四十六個，舊年新登記工會只有廿三間，其中十八間喺九至十二月登記；喺今年一月至本月二日呢四個幾月，新登記工會已有二百一十二間，數目係上年全年嘅九倍。申請數目更驚人，舊年每個月零宗至一百零九宗，今年三月已升至九百七十八宗，四月更多達二千三百四十三宗，佔舊年四千三百廿八宗申請嘅百分之五十四。
勞工處初步統計，舊年八百六十六間僱員工會中，同香港工會聯合會有聯繫工會有一百九十一間，而同香港職工會聯盟聯繫就有七十八間。工聯會理事長黃國話工聯會有二百五十三間屬會同工會，並無因政治原因新增工會登記，而成立工會目的唔係政治化爭取特首選委投票權。
職工盟主席吳敏兒就話網民發起以七人組成工會嘅運動同佢個工會無關，有關而成功登記嘅工會只有二、三十個，仲話工會運動不只為政治投票，亦要關注勞工權益。