政情：棄選律師會理事會 蔡梓蘊退居幕後
香港律師會理事會喺本月底改選其中五席，提名期尋日截止。有逾十人表明會參與選舉，當中有六人為「開明派」組成兩張名單出選，有部分係喺反修例示威活動中做義務律師。但經協調後，其中一名義務律師蔡梓蘊決定棄選。
原本蔡梓蘊、彭皓昕同喺兩年前參選但落敗嘅人權律師林洋鋐合組名單，另一張名單就包括反修例義務律師蔡穎德、律師會年輕律師小組主席陳嘉豪、同公益律師服務委員會委員黃耀初。除蔡梓蘊，另外五人尋日到律師會報名參選。蔡梓蘊解釋，話經開會商議後，認為兩個團隊理念相近、各有長處，認為合作可互補不足，所以決定唔參選，由幕前退居幕後。
蔡穎德指冇既定立場
對於有意見質疑五人嘅政治立場傾向民主派，蔡穎德認為《基本法》保障港人在被捕後可索取法律意見，作為律師亦有責任提供意見，唔認為做義務律師就有既定立場，又表明自己冇政治聯繫，認為律師會係專業團體而非政治團體，應該要保持政治中立。
據悉，現任理事莊偉倫（Warren P. GANESH）同羅睿德（Robert C. RHODA）將競逐連任，而表明有意參選嘅仲有馬康利、嚴坤穎同律師會外部事務常務委員會龔海欣。