政情：林子琼收二手口罩陰司紙

北區區議員林子琼尋日喺Facebook發文同上載咗張相，指自己收到嘅一封信裏面，附有陰司紙同剪報，同埋一個用過嘅口罩！佢話呢封信係朝早返到辦事處拆信時發現嘅，相信係同佢較早前，評論青年人牽涉喺社會衝突嘅事件有關，但就唔打算報警咁話。

林話今次係第一次收到呢類型信件，冇預料過自己會收到用過嘅口罩，所以佢拆信之時並冇戴上手套，不過就有戴口罩。而當佢拆開信件就發現有呢啲唔衞生嘅嘢，就拿拿臨去洗手，仲將信內所有物品丟晒落垃圾桶添！

之但係，就咁將啲證據丟晒，莫非佢唔打算報警追究？佢話封信係貼咗郵票、經郵差派遞，查得到嘅機會都好微，況且警方未必會派員到場，而係需要事主親身去到警署，覺得好嘥時間。佢認為最緊要人冇事、冇受到傷，所以就決定唔報警喇！