政情：問責官 推電動車齋噏 得黃錦星焗用

警務處使用率最高

環境局尋日書面回覆議員質詢，話截至三月底，政府車隊共有六千六百零四輛已登記車輛，當中有二百二十四輛唔同型號嘅電動車，佔車輛總數嘅百分之三點三。當中，電動中小型房車較多，佔政府車隊中嘅房車類約百分之九點二，而使用電動車最多嘅部門係警務處，共有四十八輛電動電單車同五十輛電動房車。

至於政府車隊嘅電動車同房車嘅比例，環境局話已較香港整體電動車佔私家車比例約百分之二點二高；政府車隊電動車嘅使用年期由一點八年至四點二年不等，每輛購入價格約由三十五萬至七十二萬元不等。

稱需視乎技術發展

然而，特首同各司局長，即問責團隊官員嘅座駕中，只有一部係電動車。環境局解釋，部門係咪可以用電動車，主要視乎電動車嘅技術發展，包括車輛性能、電池耐用程度、充滿電後行走嘅最長車程等，係咪能夠配合部門日常運作嘅需要。現時，電動房車嘅續航距離普遍已有改善。

至於特別用途車輛（例如垃圾收集車）、巴士、中型同重型貨車方面。市場上仍未有適合部門運作需要嘅電動車型號；電動電單車嘅電池性能亦仍未如理想。而喺電動客貨車方面，由於現時只有個別型號可應付行車里數同載重量較低嘅用途，因此呢類車佔政府有關車輛數目約百分之一點六。

其實早喺二○○九年，時任嘅財爺已提出用電動車，仲成立咗由自己做主席嘅推動使用電動車督導委員會。及至上屆政府，有政府高層亦話會買多啲電動車，而時任環境局局長邱騰華都話要令電動車普及，仲曾經親身去日本考察電動車嘅技術添！時至今日，事實話畀大家知，係大部分問責高官都唔用電動車，只得黃錦星一個人用，可能佢坐呢個位，要焗住撐都唔定添，整體反映政府高層推動電動車嘅決心有幾大？嗰班問責高官係咪要交代吓點解唔用電動車？到底有乜嘢難處呢？