中環出更：議員試戴銅芯口罩 嫌焗兼似底褲
尋日朝早開始，政府開始接受市民網上登記，以申領免費派發嘅銅芯口罩，雖然新口罩可能要等幾日先至透過郵遞送到巿民手上，不過唔少議員都早着先機，提前收到一個銅芯口罩嚟試用。身兼行政會議成員嘅商界議員林健鋒，就話幫市民做「白老鼠」，評測一下將會人人都有份嘅銅芯口罩，係咪真係咁掂喎！
其實林健鋒亦有份設廠生產口罩，難免將自家貨色同銅芯抗疫口罩比較一下。林開頭話銅芯口罩嘅質感，摸落都幾舒服，有隔菌技術當然重要，不過就嫌「政府嗰個焗啲」，唔及得自己生產嘅口罩咁通爽，雖然佢強調係憑自己嘅感覺，但佢又話並非「賣花讚花香」而係事實喎。至於銅芯口罩嘅外觀，林就話見仁見智咁啦，不過就希望喺設計同包裝上面再花啲心思，整多幾個款式，以免市民一家幾口出門口嘅時候拎錯啦！
創新及科技局局長薛永恒，就指政府派發可重用嘅銅芯口罩，目的係想藉環保嘅方式嚟支持市民抗疫。至於有人話口罩外觀似「底衫褲」，薛就講笑咁話，口罩應該好似底衫褲咁，每日使用同清洗喎。
鍾國斌直言似尿片 暗寸抄襲
紡織及製衣界議員鍾國斌（Felix），就直言銅芯口罩外形唔單止似底褲、亦都好似尿片，又話普通口罩得三層，而銅芯口罩足足有六層，戴上臉一定好焗。由於嫌焗同嫌樣衰，Felix話一定唔會戴出街，費事畀人影到話戴「底褲」喎！至於口罩功能，Felix就話打算做個實驗，倒啲水落去睇吓會唔會漏水，測試吓係咪真係防到飛沫。被問到銅芯口罩設計之時有冇問佢攞意見，Felix就暗寸有人抄襲，話「邊有深圳羅湖城A貨走去問LV意見！」跟住佢又批評政府口罩車工差、啲布摺起晒，不過佢對口罩最終評價係「是但啦，免費嘢，唔使錢。」市民試吓都無妨。
卓妮