政情：蕭偉強翻舊相 憶立會美好日子
逝去嘅日子，總係零舍美好。勞工及福利局前局長蕭偉強日前喺社交平台發布幾張舊相，相中人係四年前嘅佢同埋時任嘅立法會議員，不禁緬懷昔日議會裏面就算係不同陣營、不同界別嘅議員，都可以談笑風生嘅時光啊！
慨嘆香港核心價值受衝擊
除咗舊相，蕭偉強亦有發文交代，話當時正值立法會換屆在即，有啲議員決定唔再參選，亦有人對於連任未有把握，咁佢當然把握機會集郵啦！佢回想當時，無論官員抑或議員，建制定係泛民，即使議事堂上拗到咬牙切齒，但爭辯過後仍然可以談笑風生，互相尊重，而政府同唔同黨派嘅議員亦深明對方底線，彼此信守承諾。
蕭話呢啲合照彌足珍貴，但都令佢不無唏噓。因為佢覺得過去一年，一啲香港所信守嘅核心價值好似公平、多元包容、互相尊重等等受到前所未有嘅衝擊，立法會亦都接近停擺。蕭感嘆立法會仲可唔可以回復當時嘅美好，定係同呢班經已離任嘅官員同議員一樣，已經係「明日黃花」呢？