中環出更：續牌彈回頭 蘇錦樑批運輸署指示唔清晰
疫情雖稍有緩和，唔少政府機關亦都開始復工，但安排仍然立立亂！商務及經濟發展局前局長蘇錦樑前日親身前往運輸署續領牌照，點知去到先至發現，原來必須預約辦理，搞到佢架車依家唔開得，因為仲未收到運輸署寄嚟嘅行車證。蘇錦樑大嘆運輸署指示唔清唔楚，直言大有改善空間囉！
斥政府冇以用家角度籌劃
蘇錦樑話自己喺運輸署網頁找到所需資料，填好同搵齊所有文件後，以為咁就可以走去運輸署續領牌照，點知臨入大門，竟然換嚟嘅係保安嘅一句：「要預約！」蘇指網頁顯示係話市民「可選擇預約」，但其實說話嘅真正意思係指市民，必須預約先續到牌。蘇仲加咗反白眼嘅表情符號，大叫救命啊！
有唔少網民留言表示自己都有類似經歷，蘇就話政府應該以用家嘅角度去籌劃服務，咁先可以畀到市民一個好嘅服務感受。又有人提議蘇可以將文件投入收件箱，不過蘇話要等成十個工作天，仲講笑話運輸及房屋局局長陳帆要急吓市民所急喇！
卓妮