中環出更：獲贈靚牛扒 正生同學齊下廚有口福
巿場需求疫弱不振，過剩嘅食物除銷毀外，其實係有更好嘅出路。疫情下有航空公司為免浪費食物，日前向正生書院捐贈一批四百八十磅嘅一級牛扒。校長陳兆焯話，該校寄宿生嘅膳食，向來都係多菜少肉，如今獲贈優質牛扒，同學不但大快朵頤，且係實踐廚藝嘅大好機會。
陳校長話正生書院好重視同學嘅自理能力，所以校內嘅一日三餐，都係由弟兄姊妹輪流炮製。因遵循均衡飲食嘅原則，飯餸一般都比較簡樸。如今獲贈優質牛扒，同學有得加餸之餘，亦予廚藝老師上佳嘅教材，指導同學烹調牛扒嘅技巧，譬如需經過「挑筋」嘅處理，先至唔會糟蹋上等牛扒嘅細嫩肉質。不過陳校長又認為，滿足口腹之欲只係其次，重要嘅係同學都具體感受到外界對佢哋嘅支持，同明白到一切都得來不易。
謝海發向基層派口罩大米
傑出青年協會前主席趙傑文，就話禁聚令實施初期，有啲企業會將未能及時出售，但又不宜久藏嘅食物，送贈畀民間組織，而佢經營嘅社企餐廳，早前就獲得航空公司捐贈果汁，與及某私人機構送出冷藏豬骨，無形中減輕社企餐廳購買食材嘅成本，於是供應畀長者嘅飯餸分量就可以有所增加。
講起捐贈食物，身兼扶輪社分社創社社長嘅香港青年創業家總商會主席謝海發，近日就代表其扶輪社分社，向香港單親協會及九龍樂善堂派發口罩，與及捐出五百公斤大米以惠及基層家庭。謝指出經濟活動遭受疫情嚴重打擊，糧食價格未因需求萎縮而下跌，反而部分食材如豬肉，其售價反而逆巿向上。失業率不斷攀升之下，愈來愈多基層家層面臨無飯開嘅困境。謝認為與其一窩蜂咁派口罩，不如送贈糧食，更符合弱勢社群目前嘅殷切需要。
卓妮