政情：政府擬全民派罩 鍾國斌：後知後覺
政府早前宣布因應教育局嘅要求，懲教署喺上月開始生產小童口罩，整好嘅口罩就會交畀教育局，以便復課嘅時候幫助有需要嘅學童，但冇講到幾時有口罩派畀市民喎。
嘲慢咗三個月
港大微生物學系講座教授袁國勇日前爆料話政府打算「全民派可重用口罩」，但市民嘅反應就係鬧政府慢咗三個月。
其實依家市面上嘅口罩已經冇先前咁短缺，甚至已經有重用口罩賣啦！先前研發可重用口罩嘅紡織及製衣界議員鍾國斌（Felix）就喺社交平台貼文窒政府，話政府終於明白佢三個月前研發布口罩嘅因由同埋好處，仲話「政府做嘢後知後覺，不過做好過唔做」。
唔少人都以為政府派嘅可重用口罩就係Felix研發嗰款，但其後Felix話唔係喎，而創新及科技局就回覆話，政府喺二月份宣布會利用抗疫基金研發及生產可重用口罩，目標係令每個市民都有，而籌備工作已進入最後階段，並會盡快公布詳情。
其實香港早喺幾個月前就出現「口罩荒」，而政府依家仲「籌備緊」派口罩，唔知疫情結束先，定政府派口罩畀市民先呢？