政情：林健鋒口罩廠退出資助計劃 盼優先供應予學童
新冠肺炎疫情雖然稍稍緩和，但口罩仍然係市民嘅必需品。早前有唔少嘅商家都成立生產線整口罩，但商務及經濟發展局尋日就公布，有三條早前獲批嘅生產線退出參與本地口罩生產資助計劃，其中一個退出參與計劃嘅申請者係由經民聯行政會議成員林健鋒牽頭成立嘅匯愛香港有限公司，究竟點解要退出呢？
指復課在即 口罩需求增加
林健鋒話因為要獲取政府資助就需要向政府供應一定數量嘅口罩，但佢留意到市面口罩仍然短缺，尤其學校未來可能會復課，對口罩需求增加，所以希望優先向學童同市民供應口罩，口罩價格就會因應未來情況而調整。咁會唔會影響政府採購口罩嘅計劃？佢就話向市民供應口罩同樣係為香港貢獻，又強調口罩廠設立嘅原意並唔係為咗得到政府嘅資助。
政府又話呢三個退出嘅資助名額已經批咗畀其他公司，預計計劃下全部二十條獲批資助嘅生產線全面投產之後，每個月合共可以向政府供應三千三百八十五萬個口罩，另外剩低嘅七百一十五萬個口罩就會供應本地市場。