政情：竄改鴉片戰爭 葉建源盲撐失德教師 歪曲歷史當小事

雖然事後校方向家長發信致歉，但唔少家長就擔心事件唔係單一個案，多位議員亦都收到家長投訴。作為教育界議員嘅葉建源都承認該名教師授課嘅內容有錯，但就話校方已經道歉，又話應該畀機會該名老師辯解，唔可以未審先判。

議員斥類似個案接二連三

講講吓，葉仲變相批評其他關注今次事件嘅議員。佢話有議員將一位老師嘅錯誤講成普遍老師嘅問題或者教育界嘅問題，係以偏概全。佢又話有啲人用單一個案攻擊甚至中傷教育界，令人非常反感，仲形容為「政治批鬥」添！之後，佢仲呼籲政界人士高抬貴手，畀教育界寧靜嘅環境進行教學喎。

其實多位議員前日已去信立法會教育事務委員會主席葉劉淑儀，希望新增議程討論有關事件。聯署人之一嘅柯仔就逐一反駁，話老師去了解史實係好正常嘅，但顛倒歷史就不可接受，希望委員會可以全面檢討。至於葉話「單一個案」，柯仔就話類似個案接二連三，包括教師、教材都試過出問題，導致市民好擔心。

促教局全面檢討政策教材

至於葉呼籲高抬貴手，柯仔話唔係呢個問題，而係事情好嚴重，授課有誤導、渲染嘅成分，將會誤人子弟，唔可以話道歉就不了了之，反而需要教育局嚴肅處理囉！而葉講嘅「未審先判」，柯仔就話全港市民都見到發生咗乜嘢事啦，邊到存在未審先判呢？佢仲話葉唔應該用美好嘅理由或者藉口去掩飾囉。

柯仔話無論係唔係個別事件，今次都凸顯咗教育局處理教材、教師失德等事嘅政策需要全面檢討，又希望學校唔好縱容、包庇類似事件涉事嘅教師。佢要求教育局嚴肅檢討事件，畀公眾一個交代之餘，同時都要檢討依家嘅教育政策，認真考慮將中國歷史科定為高中必修科咁話喎。