中環出更：曾國衞訪送藥中心 為義工打氣
政制及內地事務局局長曾國衞防疫救人一向「當仁不讓」，做咗局長之後一樣事事關心，新上任嘅佢，尋日到訪為廣東同福建有緊急藥物需要港人送遞處方藥物特別計劃而設嘅臨時工作中心，了解送藥嘅具體安排，又向參加計劃嘅義務工作者打氣，感謝佢哋熱心參與。
至四月已逾七千港人受惠
強制檢疫措施下，唔少身處廣東省同福建省嘅港人唔能夠如常來港覆診或領取處方藥物後即日返回內地。為解決佢哋面臨處方藥物不足嘅情況，政府喺二月廿四日推出呢個計劃，幫居於廣東同福建嘅港人送遞處方藥物，並優先處理四月底或以前耗盡處方藥物嘅求助個案。
曾國衞話截至四月廿九日為止，已經有超過七千六百位港人受惠，多謝工聯會為計劃提供義務服務，又感謝香港藥學會同香港藥學服務基金，委派藥劑師喺臨時工作中心協助核對藥物同求助人嘅資料，以及參與計劃嘅各部門同事。
卓妮