中環出更：疫下拍片授課 姚珏：對藝術有更深感悟
疫下嘅生活有乜嘢感受呢？唔同人有唔同嘅體會，而著名小提琴家、香港弦樂團創辦人兼藝術總監姚珏就喺網上話，突如其來嘅幾個月空暇，多咗時間陪伴家人、回顧過往同反思人生。
受疫情嘅影響，姚珏都停止公開演出同面對面授課，但停課不停學，佢就透過視頻去授課，而喺呢幾個月不一樣嘅生活令佢有所頓悟。係乜嘢？佢話認識到其實人類非常能够適應唔同嘅世界，因為好多時大家都已經熟悉咗一種生活方式，所以「改變」就變得好唔舒服，但佢覺得喺呢段時間只有改變習慣先能夠突破自己。
佢又形容生活就好似喺一間「地球學校」讀書咁，呢段時間佢學到立足於世，唔可能永遠要求他人嚟符合自己嘅需要，否則只會一直生活喺一個唔滿足嘅狀態下，反而大家能够敞開心胸，真正地經歷每分鐘，享受每個時刻，咁大家嘅人生路程一定會好多姿多采，正如藝術來自生活，佢覺得喺呢次疫情過後，大家都會對生活同藝術表達有更深刻嘅感悟。
武術界名宿李暉開設太極中心亦要停課。佢喺網誌話當年沙士疫情，中心都勸喻有病症或去過醫院嘅同學暫停上學，其他正常，仲話當時上課率保持七成，直至疫情結束至今基本冇放過長假。
李暉仍每日返太極中心練劍
但新冠肺炎全球爆發，李暉認為地球需要淨一淨，人心都需要靜一靜，就叫大家當係放個長假喇！但放假做乜好？佢每日都返中心練劍，又同辦公室同事一齊清潔打掃，保持練功房嘅「人氣」，又抄經同站樁練拳喎。
可能喺疫下困得太耐，好多市民喺過去幾日假期都四出郊遊，身兼醫生同香港收藏家協會前會長嘅唐卓敏都話假期喺郊外嘅人比市中心仲多，佢就乖乖留喺屋企打乒乓波。
卓妮