政情：建造業極速作歌 籲同心抗疫

唔少工友參與視頻製作

可持續大嶼辦事處副處長汪志成包辦歌曲《抗疫同舟》嘅作曲同填詞，寫好之後交畀土木工程拓展署署長劉俊傑，而劉就即刻聯絡建造業界，「拍板」錄歌。發展局局長黃偉綸話共有十九位建造界人士參與演唱，亦有唔少工友參與視頻製作。由拍板到錄音用咗兩個禮拜，其中錄音淨係用咗兩日就完成，真係好有效率喎。

工程界議員盧偉國話呢首歌凸顯業界同心抗疫嘅精神，話業界喺抗疫之後重振經濟都係重要嘅力量，希望市民聽完《抗疫同舟》可以感受到業界嘅心意。地產及建造界議員石禮謙話，業界面對「抗疫戰」十分認真，先前仲成立咗基金關懷業界工友。建築、測量、都市規劃及園境界議員謝偉銓相信業界同香港同心，一定可以成功抗疫！