政情：今日你上鏡：梁美芬同助手食晏 隔住塊膠板

疫情肆虐之下，出外用膳要食得安心，就梗係要保持人與人之間嘅距離啦！議員梁美芬日前喺金鐘某商場食晏，雖然有助手幫佢點餐，然後又將午餐遞上卡位，不過佢坐咗一段時間都未起筷，只係坐喺度講電話，莫非助手幫佢點嘅午餐唔啱胃口？望真啲原來係助手搵緊有膠板分隔四人枱座位。當發現到有位之後就即刻轉枱，雖然佢係同助手面對面咁食飯，不過兩人中間就多咗塊透明膠板。梁話自從疫情爆發後，就算同朋友或者同事食飯，都會各自各食盡量唔講嘢，寧願食完飯之後帶番口罩先傾偈，咁做大家都會安心啲。