政情：八網難逃：錯版口罩遮埋面 鄭承隆冇眼睇

新冠肺炎今年喺全球爆發，唔少人都搶口罩自保。有社會人士陸續設廠整口罩，其中新思維副主席鄭承隆都有份，仲做埋監工添。鄭承隆尋日就喺Facebook上貼咗張戴口罩嘅相（圖），不過個口罩就唔止遮口，仲大到可以遮晒佢成塊面添。佢仲話「都話咗做Face Mask」，而且仲戴埋副眼鏡，唔通真係想生產超大碼口罩？有唔少朋友都留言讚搞笑，其中有人仲幫佢加工，畫番對眼畀佢，亦有人問係咪錯版添。雖然佢就冇回應係咪錯版，不過佢喺個貼文中講咗句「苦中作樂」，相信都應該真係錯版喇！