政情：舊橫額錯字網民無限Loop 容海恩：清者自清得啖笑
唔少議員嘅Banner（橫額）都試過印錯字，而呢幾日社交平台上開始瘋傳議員容海恩（Eunice）嘅Banner上面，將「北區醫院擴建及翻新工程」寫成「北區醫院擴建及翻身工程」喎，究竟北區醫院出咗啲乜嘢事，搞到需要翻身呢？
翻新寫咗翻身
我哋問番Eunice，佢話張Banner係兩年前嘅舊嘢，但當時係寫錯嘅，亦都曾經有媒體報道過呢件事。佢又話如果細心睇，可以見到Banner上面嘅辦事處地址係舊嘅，辦事處一早就已經搬咗啦。至於對網民「舊事重提」有乜嘢睇法？Eunice就話唔知點解又畀人拎番出嚟講，但「清者自清」，就算畀人「整蠱」，睇完都係得啖笑喎。
而Eunice亦都喺社交平台貼文話Banner唔係翻身亦都唔係翻新、而係事隔兩年「翻生」喎。而畀人翻舊帳、「炒冷飯」嘅新聞唔止呢單，仲有佢幾年前同泛民議員一齊做節目，去體驗聾啞人士照顧小朋友嘅艱難，Eunice都喺社交平台一併澄清埋。雖然佢口頭上話得啖笑，但都特登喺社交平台澄清，似乎都有啲介意喎！