政情：兩區會夾擊徐英偉未坐暖忙拆彈

指當局涉越權干涉運作

擬提出覆核嘅觀塘區議員梁凱晴，佢尋日話，當局喺多份關於音樂噴泉嘅民調中，淨係採用咗一份由民建聯進行嘅調查。佢話嗰份調查顯示有百分之九十嘅市民同意興建項目，但當時另一份由東九社區關注組進行嘅民調反映有百分之八十五嘅市民反對興建，認為當局有忽視其他市民聲音之嫌。佢又話任何區內項目應由區議會審批同主導，但當局涉嫌越權干涉區議會嘅社區項目撥款同運作，而項目嘅設計曾作出改動，亦未有先諮詢區議會嘅意見，認為程序上有問題。

觀塘區議會主席蔡澤鴻話區議會前日開會討論音樂噴泉，已經盡最大努力同民政事務總署商討，會上亦提出可唔可以淨係起個「水池」，唔好整成個「噴泉」？佢話如果繼續「水池」嘅工程，一來冇違反立法會財委會嘅決定；二來冇延誤工程；三來冇新增費用，但署方堅持唔肯退讓，所以最後談判破裂。

蔡澤鴻話政府唔肯退讓，以後有關音樂噴泉嘅事宜都會以區議會名義發表意見，仲話稍後會同灣仔區議會主席楊雪盈商討，係咪就觀塘音樂噴泉同灣仔摩頓臺社區活動中心一齊提出司法覆核添，但現階段就需要先諮詢法律意見。

民政署：按一貫程序處理

當局同區議會嘅關係好緊張，再加上之前民政事務總署削減區議會撥款，已惹起好大嘅反彈，徐英偉上任局長只有個幾禮拜，亦未見有聲氣約見十八區區議會正、副主席，依家又要面對兩項社區重點項目計劃或入稟法庭提出司法覆核，可謂「櫈都未坐暖」就遇着難題啦！唔知佢點拆彈？

民政事務總署回覆我哋，話音樂噴泉當時得到大部分區議員支持，亦喺二0一八年十一月三十日獲財委會撥款，有關嘅建築工程合約完全符合法律同程序要求嘅招標過程而簽定。而音樂噴泉項目嘅工程現正進行中，預計於下年年中完成，又話如果工程日後進入法律程序，將按照一貫程序處理喎。