中環出更：疫境變廚神 龐愛蘭拍片教整叉燒
疫情之下大家都少咗出門，留喺屋企無嘢做，好多人都開始鑽研廚藝，人人都化身小廚神。香港藥學會會長龐愛蘭（Scarlett）就化身飲食KOL拍片教人整嘢食，今次佢仲教大家整DIY叉燒添！
Scarlett親自去街市買半肥瘦豬肉，佢教大家唔用叉燒、海鮮同柱侯醬，淨係用平時家常料理嘅醬料嚟焗叉燒。Scarlett對醃肉都好講究o架，佢話因為擔心醃料入面嘅物質會同膠袋有化學反應，所以醃肉過程中盡量避免使用膠袋，仲要醃足二十四小時先去焗，確保啲叉燒入味。之後再用二百度焗三十分鐘，中途要拎出嚟塗多層蠔油等啲叉燒上色，再焗多十分鐘。最後龐愛蘭拎住製成品合照，望落都似模似樣o架！
張李施源整紅燒獅子頭「走油」
紫荊青年商會前會長張李施源（Fion）亦都留喺屋企嘗試炮製唔同嘅菜式，今次就試整紅燒獅子頭呢味上海菜。佢話紅燒獅子頭本身會用油炸一炸，令外皮鬆脆啲，不過Fion就想健康啲，於是先用焗爐焗至八至九成熟，再放入上湯灼一灼，咁就毋須用油，依然有皮脆肉嫩嘅口感。Fion話屋企人都好鍾意佢呢道新菜式，尤其是家中三位仔女都好鍾意食豬肉、咁就啱晒大家嘅口味喇！
荃灣前區議員林琳都唔執輸o架，林琳因為之前整親對腳，朋友前區議員關浩洋（Roger）就上佢屋企探佢，順便一齊煮飯仔。林琳同Roger邊煮嘢食邊傾偈，非常悠閒。林琳話要整手撕雞畀Roger食，仲親自炸紅葱頭，等啲油香啲喎！整完之後兩人一齊配飯食，簡單得嚟又好送飯！林琳並唔係見有朋友嚟先下廚o架，其實平時佢都有煮開嘢食。早前因周末要全日透過網絡上堂，期間唔想捱餓就要自己煮嘢食，而佢就煮咗涼伴麻醬青瓜添啊！
卓妮