政情：拒資助理大病毒快測 薛永恒甫上任認衰
香港一直銳意發展成智慧城市，但本地創新科技項目就未獲政府提供足夠支援。早前本地有大學研發出新冠病毒快速測驗儀，但其資助申請遭創新科技局否決，令政府備受市民批評。新上任創科局局長嘅薛永恒尋日就「認衰」，承認局方嘅市場觸覺，未必有市場本身咁敏銳，但就強調創新科技唔能夠只係由政府推動。
薛永恒尋日出席電視節目時又透露，政府近幾個月收到超過三百宗有關抗疫嘅創科技術資金申請，正審批相關項目，又話有好多項目具有推出市場嘅潛能，相信可提升市民生活水平。被問到疫情會唔會影響到創科技術商品化時，佢就話疫情既係挑戰，亦係機遇。又舉能夠殺菌嘅納米塗層產品為例，指有啲產品喺疫情發生前市場未必會接受，但現時卻被廣泛應用。
智慧燈柱惹議 稱政府已作修改
薛永恒又回應智慧燈柱嘅爭議，指政府已修改部分功能，喺以科技改善民生同市民私隱間作出平衡。佢仲話，科技所帶嚟嘅改變，難免會惹起部分人嘅顧慮，但只要政府開誠布公，將新科技嘅利弊話畀公眾知，相信市民會有智慧做抉擇。