政情：鄭若驊避政靠鍵盤 無能應撤換
政府日前大換班，但民望長期「墊司底」兼被嘲為「避政司司長」嘅律政司司長鄭若驊竟然可以留任，議員謝偉俊前日批評鄭能力有問題，對外解說工作不足，質疑點解無換走鄭。鄭畀人狠批後喺尋日發表網誌補鑊，解釋檢控決定不涉政治考慮，發出聲明要求律政司放棄檢控、或者發表言論企圖左右律政司嘅獨立檢控決定都必定會徒勞無功。不過就有學者指鄭只懂得寫網誌回應具爭議嘅事件，儼如「鍵盤戰士」，建議佢應該盡快辭職，唔好阻住個地球轉。
謝偉俊喺電台節目指出，話政府官員有替換好正常，不過就唔明刑事檢控經驗不足嘅鄭若驊點解無被換走。謝形容鄭若驊好似一個淨係識整甜品嘅廚師，但要負責整晒成間大酒店嘅餐飲喎！謝稱律政司喺建制上好重要，但係鄭連《基本法》第二十二條嘅爭議，一直都無發聲，謝質疑鄭喺刑事檢控上嘅能力同經驗都好有問題，講嚟講去都淨係得仲裁，就好似個廚師淨係講甜品，唔識炮製主菜咁囉！
外國干政 只敢網上虛應
至於包括壹傳媒黎智英在內嘅十五位泛民人士，早前因涉嫌組織及參與未經批准嘅集結，而被警方拘控，惹來外國政客批評港府嘅做法。鄭仍然靠網誌解畫，而唔敢出嚟解釋。佢喺網誌話《基本法》第六十三條規定律政司「主管刑事檢察工作，不受任何干涉」，而律政司檢控人員一向獨立行事，唔會受政治或者其他不當嘅壓力左右，更加唔應該畀一啲海外政客因政治目的，而非基於證據同法律所發表嘅言論影響。
政務司司長張建宗亦都發表網誌幫鄭若驊補鑊，指律政司嘅檢控工作，係嚴格按法律進行，檢控人員一向獨立、專業咁履行憲制責任，形容係「無畏無懼」同「不偏不倚」，外國政府或國會議員都唔應該干涉香港內部事務，或者企圖干涉律政司嘅檢控決定。
解說不足 難釋公眾疑慮
理工大學專業及持續教育學院講師陳偉強狠批，既然鄭若驊呢幾個星期處理一啲具爭議性嘅事件，容易引起外國社會指手畫腳，理應親身出嚟向媒體解說，釋除公眾疑慮，而鄭發表網誌解釋工作嘅行為如同「鍵盤戰士」，一嚟網誌唔多人睇，二嚟公眾嘅疑問未得到完全嘅解說，容易再度引起其他爭議，認為鄭唔係一位「敬業樂業」嘅司長，建議佢都係盡快退位讓賢喇！