中環出更：藍鴻震大讚曾國衞做事乾淨利落
早前港府高層出現「大換血」，五個政策局同時更換局長。五名新局長當中，出任政制及內地事務局局長嘅曾國衞，原本係入境處處長，其紀律部隊嘅出身惹嚟唔少議論。民政事務局前局長藍鴻震尋日出席一個論壇時亦講到呢個話題，佢覺得社會毋須過分解讀曾嘅出身，又讚揚曾做事乾淨利落，早前出任入境處處長時，更致力協助受疫情影響而滯留外地嘅港人回港。
不點名批評有高官卸膊
至於外界有聲音，認為政府今次換人唔能夠幫助政府提升民望，藍鴻震就認為喺疫情之下，政府低民望屬必然，但就不點名批評現時政府高層有人做事卸膊。佢又提到唔少新上場嘅官員比較年輕，認為社會應該要給予機會，強調外界對佢哋嘅評價，應該基於佢哋日後嘅工作表現。
外界亦有聲音質疑新任民政事務局局長徐英偉有建制政黨背景，可能係抗衡目前由泛民控制嘅區議會。藍鴻震就話，其實民政事務局嘅工作範疇有好多，包括體育、文化等等，亦會幫助政府收集民意，而區議會事務僅屬其中一部分。
卓妮