中環出更：禁聚令嘉賓裹足 陳盈盈：搞隔空開幕禮
疫情不但導致停工停課，就連民間團體所舉行嘅社區活動，亦都困難重重。維多利亞青年商會會長陳盈盈（Aimee），就話向大眾推廣聯合國可持續發展目標，係該會今年嘅旗艦項目，然而礙於疫情，開幕禮要延期進行之餘，部分嘉賓亦因禁聚令而裹足。儘管問題棘手，但幸好大家都身處網絡時代，開幕禮過程就惟有透過社交媒體隔空進行。
雖然開幕禮可透過網絡解決，不過Aimee擔心，環球疫情若果未能盡早結束，各國仍然維持出入境限制的話，維多利亞青年商會於八月份舉行嘅七十周年會慶，外國嘉賓就無法出席喇。從事旅行用品生意嘅Aimee話，佢嘅客源主要來自美國，但由於當地疫情嚴重，生意都受到一定影響，所以佢都要諗吓多元化發展業務。
陳孟昇嚴守安老院 查探訪者家宅
副會長陳孟昇（Manson）就有經營安老院舍，同寵物糧食嘅生意。佢話疫情底下，探訪長者變得好複雜，因為院舍職員為探訪者辦理登記手續，就好似「查家宅」一樣，除咗問探訪者最近十四日有無外遊，亦都要問埋探訪者嘅屋企人有無外遊。Manson話，長者抵抗力比較弱，一人中招而導致集體染病嘅機會好大，所以佢已經要求院舍員工加強清潔同消毒工作。Manson又話，因好多上班族近來都改為居家工作，陪伴寵物嘅時間相對多咗，帶旺寵物食品嘅生意，亦有唔少客人願意使多啲錢，訂造特殊口味嘅寵物食品以取悅「主子」咁話。
講番今次活動。出席開幕禮嘅傑出青年協會秘書長鄺海翔，就認為大家雖身處物質豐裕嘅社會，但若果唔懂得分享，尤其是一遇上傳言風聲就四出搶購，咁就更多物資都唔夠，人類嘅存續就會面臨好大嘅問題。所以學懂愛同分享，就係一種生存之道。亞洲教練及導師學院績效教練導師林文惜，就對鄺嘅見解，相當認同。
卓妮