政情：案件千四宗 僅一人被控 起底成瘋 黃繼兒被轟唔重視
上年香港社會發生反修例示威衝突，期間仲爆發埋「起底」潮添，個人資料私隱專員黃繼兒就話已經將一千四百宗案件交由警方處理，但截至去年十二月三十一日為止，警方就涉違反《私隱條例》第六十四條嘅個案拘捕八人，其中一人被控。成千宗個案只係檢控一人，唔怪得知有建制派議員批評檢控同拘捕數字非常低，仲質疑係咪公署唔重視添！
黃繼兒尋日出席立法會政制事務委員會會議，期間提到上年有成五千宗起底投訴，當中有一千五百八十宗係涉及警員同埋家屬被起底立嘅個案。起底投訴個案中，有四千三百幾宗係同上年反修例事件有關，佢形容起底行為已經「武器化」。
張華峰促公署諗啲新橋
喺會上都有唔少建制派議員質疑點解檢控數字會咁低，議員陸頌雄就話自己都係起底嘅受害者之一，仲話起底會影響屋企人同埋朋友。佢認為社會應該要正視番起底問題，仲質疑點解檢控同拘捕數字會咁低，質疑係咪人手不足，定係公署根本唔重視有人被起底嘅事。
唔止陸頌雄，議員張華峰話喺反修例示威開始後，香港出現前所未有嘅網絡欺凌同起底行為，仲形容情況愈嚟愈嚴重，令人觸目驚心。佢仲認為起底行為唔單止令社會撕裂，亦反映咗市民對個人私隱認知有不足，覺得公署應該要推行公眾教育。同時佢仲提到，話過去公署都有啲專業嘅公眾活動，但吸引唔到市民參與，關注會唔會有啲乜嘢生動嘅方法去推廣。
私隱署：冇調查檢控權
面對被議員質疑，黃繼兒就解釋，話公署喺調查同埋檢控方面冇權力，剩係可以將相關資料同埋證據交畀警方調查同埋檢控，仲估計可能因為最近社會上都有唔少事要處理，所以檢控數字偏低。佢仲話起底人士冇用真名，而且啲平台都唔係喺香港運作，所以公署只能以勸喻形式去要求對方提交資料。
黃繼兒仲話，過去公署着重正規方式去做公眾教育，例如舉行研討會，不過依家會用社交網頁，透過啲簡單易明嘅方式去宣傳，例如係用啲年輕人使用嘅語言。