政情：潘佩璆提醒KOL 咪譁眾取寵

喺舊年區議會選舉大敗後，佢哋就轉攻網絡平台，一時間多咗好多KOL，但多唔代表好，都要講質素嘅。潘佩璆都發現呢個問題，所以喺Facebook貼文提醒呢班新進KOL，講咗幾項必要條件，首先就係唔好為言論定調，禁絕雜音，仲話最好多啲一齊講，多啲唔同嘅睇法同意見，就會令訊息更加豐富同有感染力。

講嘢要有根據 以免幫倒忙

佢仲話近年經常睇到一啲訊息，標題好吸睛，但就冇乜內容，甚至乎係無中生有，所以勸喻佢哋應先做一啲資料搜集，講嘅嘢要有根有據，唔好譁眾取寵，否則好容易被擊倒，會失去大眾信任，變咗幫倒忙。最後要避免人身攻擊，要就事論事，就算要評論個人，話到口邊亦要留半句。