中環出更：髮廊生意暴挫 劉玉棠：上門美髮亦少客
足不出戶，的確可避免疫情傳播，不過經濟巿道，就難免一潭死水。香港專業髮廊管理協會會長劉玉棠，指居家避疫嘅環境下，就算平日好講究儀容嘅人士因社交接觸大減，導致美髮意欲不振。以致快剪店或屋邨髮廊嘅生意都有明顯跌幅，而位處旺區嘅高級髮廊，近日嘅營業額更暴挫七成，行業所受嘅衝擊可謂前所未見。
既然大家都深居簡出，到底髮型師可唔可以移船就磡，為客人提供上門美髮嘅服務呢？劉玉棠話業界係有人咁做，但由於交通費用同往來時間都屬於經營成本，所以髮型師上門嘅收費，必定較店舖高出五成至一倍，因此要求上門美髮嘅客人相當有限。儘管政府有推出紓困措施，但礙於業界經營，從業員多數係以自僱形式，同髮廊老闆拆帳分成，因此難以受惠。劉話希望今次疫情，可以促使業界步向現代化嘅經營管理模式，長遠而言，亦需要一位業界代表喺議會裏面爭取權益。
受疫情影響，外賣所佔嘅餐飲業經營比重亦急升。香港青年創業家總商會主席謝海發，就認為唔係好現象，若果食客都寧願嗌外賣，餐飲業又何需負擔高昂嘅租金以維持堂食呢？
謝海發：餐飲業需再研外賣流程
謝海發又話堂食縮減，食肆對洗碗工嘅需求就冇過往咁殷切，必然波及到中央洗碗工場嘅業務。不過佢相信香港經此一「疫」，餐飲業對於外賣嘅包裝以及流程，亦會更花心血思去研究。
傑出青年協會前主席姜炳耀，因經營室內設計工程嘅關係，發覺好多裝修材料店都門可羅雀。雖然佢同一班師傅都有工開，不過「柯打」都係疫情爆發前承接，佢擔心兩個月後嘅市道，會較目前更加不景。
卓妮