政情：公民講場：食署蚊過興兵 唔踢永遠唔會郁

新冠肺炎疫情稍為緩和，但唔好開心住，事關爆出本港今年首宗登革熱個案。喺呢宗個案確診後，食物環境衞生署先識驚，大舉出動去滅蚊，之但係咁做都只係事後補鑊啫！香港嘅蚊患指數一直都好高，尤其喺呢段回暖嘅時候，蚊患更勁，其實食環署年年都畀人鬧滅蚊不力，但係鬧完，署長劉利群都當冇件事咁，之後繼續重蹈覆轍，永遠都係後知後覺，下下要踢先郁真係好唔掂喎。